దంతాలు ఆరోగ్యంగాఉంటే, సాధారణ ఆరోగ్యం
బాగుంటుంది. అనేక కారణాల వలన దంతాలు ఇన్ఫెక్షన్లకు లోనై దంత క్షయం
సంభవిస్తుంటుంది. దంతాలు ఇన్ఫెక్షన్లకు లోనై నప్పుడల్లా ఆ భాగంలో విపరీతమైన నొప్పి
కలుగుతుంది. ఈ నొప్పి దంతాలలో కాని, అవి ఉన్న
భాగంలోని దవడ ఎముకలలో కాని ఉండవచ్చు.
నొప్పి విడవకుండా ఉండవచ్చు. లేదా పొడుస్తున్నట్లు కాని, దేని తోనో
కొడుతున్నట్లు కాని అనిపించవచ్చు. ఈ
విధమైన దంత శూల కలగడానికి వివిధ కారణాలున్నాయి. వీటిలో ముఖ్యమైనది దంతక్షయం. దంత మూలాలలో ఇన్ఫెక్షన్లు కలగడం వలన దంతక్షయం
ఏర్పడి నొప్పి కలుగవచ్చు. దంతాలపైన ఉండే
ఎనామిల్ నాశనమై, దంతాలలోని సున్నిత భాగం పైకి వచ్చి మనం తీసుకునే ఆహారం, చల్లటి నీరు
మొదలైన వాటి తాకిడి కారణంగా నొప్పి కలుగవచ్చు. అలాగే ఏవేని ప్రమాదాల కారణంగా
దంతాలు విరగడం కూడా దంతశూలకు కారణం కావచ్చు.
ప్రథమ చికిత్స
- దంత క్షయానికి
గురవుతున్న దంతం చుట్టూ లవంగ నూనెను రాయడం ద్వారా ఉపశమనాన్ని పొందవచ్చు. నొప్పి
ఎక్కువగా ఉన్నప్పుడు రబ్బరు సంచిలో వేడినీటిని పోసి (హాట్వాటర్ బ్యాగ్) దానిని
నొప్పి ఉన్న వైపు బుగ్గలపై పెట్టుకోవడం ద్వారా బాధనుంచి నివారణ పొందవచ్చు. - దంతశూలను
తగ్గించుకోవడానికి అనేక విధానాలున్నాయి. ఆహార పదార్థాలు, పండ్లు, ఐస్ క్రీమ్ మొదలైనవి తీసుకున్నప్పుడు పంటి
నొప్పి ఉంటే ఆ భాగంపై టూత్ పేస్టును పూయడం ద్వారా నొప్పి కలుగకుండా చేసుకోవచ్చు. - నొప్పి నివారణ
కోసం మాత్రలను వేసుకో వచ్చు. అయితే ఏ ఔషధం వాడాల్సి వచ్చినా వైద్య సలహా తీసుకోవడం
తప్పనిసరి. నొప్పి ఇంకా తగ్గకుండా బాధిస్తూనే ఉంటే, వెంటనే దంత వైద్యులను సంప్రదించాలి. అవసరాన్ని
బట్టి రూట్ కెనాల్ ట్రీట్మెంట్ చేయాల్సి రావచ్చు.
